Роден во Сиракуза како незнабожец, од родители незнабошци, богати и угледни. Философско воспитание стекна во Рим. Согласно со неговата горешта желба, беше крстен од некој благочестив старец Гордијан. Тоа ги навреди неговите родители, та за да го избегне нивниот гнев, според заповедта на свети Јован Богослов, којшто му се јави, отиде во Равена и му се јави на својот роднина, епископот Урс. Упатен од епископот, Васијан се насели надвор од градот, кај црквата на светиот маченик Аполинариј и долго се подвизуваше таму трудејќи се во пост и во молитва. Кога умре епископот на Лавдискиот град во Лигурија, според едно откровение во сон, го избраа Васијан за епископ на тој град, иако тој тоа не го сакаше. Посветувањето за архиереј го извршија Амвросиј Милански и Урс Равенски. Имаше голема исцелителна благодат; можеше и мртви да воскреснува. Беше сведок на последните часови на свети Амвросиј, од чија уста во тој миг слушна дека светителот го гледа Господ Исус Христос. Поживеа во подвиг до длабока старост, а во деведесеттата година од својот живот се упокои и се пресели во Царството Божјо околу 409 година. Неговите свети мошти останаа чудотворни, да сведочат за силата Божја и величината на овој Божји Светител.

https://pmz.mk/pravoslaven-kalendar/sveti-vasijan-episkop-lavdiski/